雖然「迪士尼黑色世界 2014」（"Disney Haunted Halloween 2014"）嘅黑暗力量受到「迪士尼光影匯」萬丈光芒嘅影響而稍為淡化，但係當中嘅故事背景則同「黑色世界」嘅部分遊樂設施及表演有好大嘅關係。有見及此，本blog 將會喺今日同大家一次過地介紹「亞馬遜驚魂」（"Horrors of the Amazon"）、「迷失異靈」（"Missing Links"）以及「黑色嘉年華『異』演」（"Sideshow Carnival Extraordinaire"）！
*********************************************************
以下內容含有劇透成分，keep magic者敬請留意！
*********************************************************
~「亞馬遜驚魂」~
~"Horrors of the Amazon"~
繼喺上年聖誕推出嘅戲偶劇場後，園方決定喺「迪士尼黑色世界 2014」將節日版嘅劇場表演推展至另一個層次。值得一讚嘅係園方會透過「探險家‧冒險家學會」引發出新嘅故事。
今年，樂園就首次邀請本地藝人陳國邦（Power Chan Kwok-pong）先生喺「亞馬遜驚魂」劇場表演入面飾演「森林河流之旅」嘅船長Jonas Brisbane！
為配合喺夜晚上映嘅「亞馬遜驚魂」，「演藝人員」會為「原野劇場」嘅入口加上相關嘅佈置。
相信有部分讀者已經喺九月份預演期間欣賞咗呢個表演，之不過園方就係正式上映嘅時候修改咗些少表演嘅情節，當中亦加插咗一啲新嘅元素，而呢啲修改確實係加強咗表演嘅故事發展，內容上亦較預演版本為豐富。與此同時，從下圖可見舞台上嘅佈置亦有些少改動。
好喇！喺時候同大家講吓表演嘅內容。表演一開始由一位Jonas嘅部下將一本筆記放喺台上，而佢之後就向身旁嘅一件物品下跪。
之後，其他嘅部下就到場，當中有人就呼籲首領應該請返「佢」出去，究竟「佢」係邊個嚟嘅呢？
Jonas Brisbane 進場！
其實在座嘅所有觀眾係「探險家•冒險家學會」（Society of Explorers and Adventurers；簡稱S.E.A.）嘅成員，而Jonas 喺開始前亦都希望大家喺聽完佢嘅分享之後可以向「迷離莊園」嘅主人亨利爵士推薦佢加入學會成為成員之一。
Jonas 提到自佢揾到已經失蹤咗多年嘅叔公埃比（Ebenezer Brisbane）嘅筆記以及地圖之後就開始追尋佢嘅下落。
Jonas 曾經提及過叔公埃比係學會早期嘅創會成員之一以及曾經居住過喺「灰熊山谷」。由於埃比失蹤咗嘅關係，所以當大家經過位於「大福小鎮」上嘅「西部囚室」嘅時候會見到相關嘅尋人啟事。
繼續講返故事發展，Jonas 喺亞馬遜探險期間就去到一個叫做巫術島嘅地方。
與此同時，佢喺島上亦捉咗唔少奇珍異獸返嚟放喺「黑色嘉年華『異』演」入面演出，而Jonas 亦特別安排咗「蝙蝠紳士」（The Amazing Bat-Boy）以及「黑鳥夫人」（Siren of the Skies）喺各位學會成員面前表演。
另外，Jonas 其實仲捉到幾隻「河妖」以及「樹怪」。只不過有啲就喺中途死咗或者係成功地逃脫咗，而最後一隻向大家嘅展示嘅「樹怪」亦都係展示過程中成功地逃脫埋。
其後，佢就向大家展示一個「喪屍戰士」嘅頭驢。之不過呢個頭驢就離奇地喺大家眼前消失咗。
嚟到分享會嘅「重頭戲」 喇！之不過Jonas 嘅部下亦都再三希望Jonas 唔好暴露「佢」嘅真身。與此同時，Jonas 仲強調呢個發現會令哈里遜．海陶偉（Harrison Hightower）佩服，Harrison Hightower III 係Hightower Hotel 嘅主人，呢間酒店亦即係現時位於「東京迪士尼海洋」（Tokyo Disney SEA）入面嘅「驚魂古塔」（Tower of Terror），而大家亦可以喺「迷離大宅」嘅室內排隊區入面見到Harrison Hightower III 嘅畫像。
可惜Jonas 都係冇聽部下嘅勸告而暴露咗巫術女祭師嘅遺體，原來「佢」就係指呢位巫術女祭師。
雖然Jonas 嘗試同巫術女祭師展開對決（甚至捉咗一位觀眾做「擋箭牌」），但係佢最後都係輸咗。
表演嘅尾聲由一眾族人提醒大家「要尊重亡靈，行開咪親近，否則就冇命」！
Jonas 就咁消失咗！
謝幕時間！
由於文字描述只係提到表演嘅重點，所以本blog 嘅編輯亦都拍攝咗一段影片俾大家隨時重温呢個表演。
另一方面，樂園亦發佈咗三段《亞馬遜驚魂─詭異錄播》嘅短片，有興趣嘅讀者可以按以下嘅文字鍵結前往欣賞相關嘅短片。
~「黑色嘉年華『異』演」~
~"Sideshow Carnival Extraordinaire"~
今年，園方透過「亞馬遜驚魂」劇場表演嘅故事連繫到「黑色嘉年華『異』演」，而「『異』演」嘅內容則同上年一樣。
「蝙蝠紳士」以及「黑鳥夫人」
"The Amazing Bat-Boy" & "Siren of the Skies"
「瘋骨妖姬」以及「森武士」
"Air-Abesque" & "Woodland Warrior"
「冰女王」以及「火焰神」
"The Crystal Temptress" & "Inferno"
而呢班奇人異士分別會喺表演前以及表演後與大家見面。
三部篷車嘅擺放位置冇變。
~「迷失異靈」~
~"Missing Links"~
Jonas 好辛苦咁捉到返嚟嘅其中幾隻「河妖」以及「樹怪」已經分別逃脫到去「探險世界」以及「迷離莊園」。
「河妖」@「探險世界」
「樹怪」@「迷離莊園」（「奇幻庭園」）
Hong Kong Disneyland Resort
COMMENTS